HATAW! D'yaryo ng Bayan hatawtabloid.com
ARESTADO ang dalawang hinihinalang drug dealer makaraan makompiskahan ng P5 milyong halaga ng shabu sa buy-bust operation ng mga tauhan ng Philippine Drug Enforcement Agency (PDEA) sa isang mall sa Cubao, Quezon City, kamakalawa.
Sa ulat ng PDEA, kinilala ang mga suspek na sina Benigno Mendoza, 30, at Jaylord Torero, 23, kapwa residente sa Pasig City.
Ayon kay Richard Tiñong, hepe ng Plans and Operations ng PDEA-National Capital Region (NCR), nasakote ang mga suspek makaraan ang halos dalawang linggong surveillance.
Nang mag-positibo ang impormasyon, agad nakipag-transaksyon ang PDEA sa mga suspek upang bumili ng 50 gramo ng shabu at naganap ang bentahan sa isang mall sa Cubao dakong 5 p.m.
Bukod sa 50 gramo ng shabu, nakompiska rin sa mga suspek ang isang kilo ng droga.
Sinasabing ang nasabing droga ay hi-grade na shabu, tinatawag na China brown at may market value na P5,250,000. (ALMAR DANGUILAN)
