Gas station owner kumasa sa 4 holdaper 1 suspek patay

PATAY ang isa sa apat holdaper makaraan makipagbarilan ang may-ari ng gas station nitong Linggo ng gabi sa Toledo City, Cebu.

Nangyari ang insidente makaraan holdapin ng grupo ang isa pang gas station sa nabanggit na lugar.

Nabatid sa kuha ng closed-circuit television footage, unang hinoldap ng mga suspek ang isang gas station at nakakuha ng P7,000 cash.

Pagkaraan ay sumakay ang mga suspek sa dalawang motorsiklo at tinungo ang pangalawang gas station sa hindi kalayuan.

Ngunit inalerto ng gas station attendant ang may-ari ng pangalawang gas station na nakipagpalitan ng putok sa mga holdaper.

Isa sa mga suspek na kinilalang si Randy Jakosalem, dating security guard, ang tinamaan ng bala sa ulo.

Bunsod nito, mabilis na tumakas ang tatlo pang mga suspek.

Gayon man, tinamaan ng ligaw na bala ang isa pang gas station attendant.

Kasalukuyan nang pinaghahanap ng mga awtoridad ang mga suspek, na ang isa ay sinasabing tinamaan ng bala.