HATAW! D'yaryo ng Bayan hatawtabloid.com
Hindi pa man natatapos ang kuwentuhan sa naganap na “Challenge of Champions Cup” sa pista ng SLLP ay matunog na rin ang usapan sa paparating na “1st Leg, Juvenile Fillies & Colts Stakes Race” na idaraos ngayong Linggo sa Sta. Ana Park sa Naic, Cavite.
Ang nasabing tampok na pakarera ay kinabibilangan ng mga bagitong mananakbo na sina Cat Express, Cock A Doodle Doo, Hook Shot, Jazz Asia, Karangalan, Leona Lolita, Princess Ella, Super Spicy at Viva La Vida.
Sila ay maglalaban sa maikling distansiya na isang kilometro (1,000 meters) lang, kung kaya’t kinakailangan na maging maagap sa puwestuhan ang mga hineteng magdadala sa kanila pagbukas pa lang ng aparato.
Base sa kanilang mga rekord na aking narebisa ay hindi nagkakalayo ang karamihan sa kanila sa lundagan o ayre sa arangkadahan, pero base sa sukat ng laban at kapasidad na aking napanood ay lalagay ako dun sa mga nasa gitnang posisyon na kayang lumusob pagsungaw sa rektahan. Kaya ang mga pangunahing napipisil ko ay sina Hook Shot at Princess Ella.
Fred L. Magno
