Jen, no time for love dahil sa rami ng work

NILINAW ni Jennylyn Mercado na hindi dahil sa hindi pa niya nakalilimutan si Luis Manzano kung kaya’t ayaw pa niyang magmahal muli. Kundi, takot siyang masaktan muli at very occupied siya ng kabi-kabilang trabaho.

“Actually sa ngayon hindi talaga ako nag-e-entertain ng manliligaw. Hindi pa kasi ako handa! ‘Wag muna,” giit ni Jen nang makausap namin ito sa launching sa kanya bilang new face ng ZH&K Mobile.

Aminado naman si Jen na marami ang nagpaparamdaman sa kanya subalit, “May nagti-text text , may tumatawag-tawag at nagpapa-cute, pero sinasabi ko naman sa kanila straight forward na hindi pa talaga ako handa at alam ko na naiintindihan naman nila.

“Siguro if ever na ready na ako, kailangan kung sino man ‘yung manliligaw sa akin dapat tanggapin nila kung ano ako, kung anong mayroon ako ngayon. At dapat tanggapin nila ‘yung pamilya ko, ‘yun ‘yung mahalaga sa akin. Package ‘yun, packaged deal!

Sinabi pa ni Jen na masuwerte siya ngayon dahil sa sunod-sunod ang trabahong dumarating bukod pa sa mga endorsement tulad nga nitong ZH&K Mobile na pareho sila ni Manny Pacquiao na endorser. Bale pang female unit daw ang para kay Jen o ‘yung may touch ng feminine samantalang si Manny ay pang-masa.

Pero sa totoo lang, maganda ang ZH&K Mobile, bongga ang klase ng kanilang cellphone na parang Iphone dahil may hotspot sila at wifi ready din, bukod sa android din ito.

ni Maricris Valdez Nicasio