HATAW! D'yaryo ng Bayan hatawtabloid.com
KRITIKAL ang isang lalaki nang makipagbarilan sa nagrespondeng pulis makaraan barilin ang isang driver at pahinante kamakalawa ng gabi sa Navotas City.
Kinilala ang suspek na si Jon-Jon Romero, 28, residente ng R-10, Brgy. North Bay Boulevard South ng nasabing lungsod, ginagamot sa Tondo Medical Center.
Kusang-loob na nagtungo sa himpilan ng pulisya ang pulis na nakabaril sa suspek na kinilalangh si PO1 Dennis Maagda, 27, nakatalaga sa Northern Police District (NPD), naninirahan sa 97 R-10, Lapu-Lapu Avenue, Brgy. North Bay Blvd. North.
Habang nilalapatan ng lunas sa Manila Central University Hospital ang mga nabaril ng suspek na sina Boyet Heneralao, 30, driver, at Benjie Marcelo, pahinante.
Sa imbestigasyon ni PO3 Jeffrey Montero, naganap ang insidente dakong 7:20 p.m. sa Lapu-Lapu Ave., Brgy. NBBN.
Sa hindi pa malamang dahilan, binaril ng nag-amok na suspek ang driver na si Heneralao at pahinanteng si Marcelo.
Habang minamaneho ni PO1 Maagda ang kanyang motorsiklo ay narinig niya ang putok ng baril kaya agad nagresponde.
Nakita ng pulis ang suspek na tumatakbo habang armado ng baril kaya agad niyang hinabol.
Ngunit pinaputukan ni Romero si Maagda na nagresulta sa palitan nila ng putok na ikinasugat ng suspek. (R. SALES)
