Pangarap na bahay ng Final Four, isasakatuparan ng Camella

ni Roldan Castro

DALAWA ang maglalaban sa Team Sarah para sa finals ng The Voice Kids. Pero mariing sinabi ng Pop Star na wala siyang favoritism kina Lyca Gairanod at Darren Espanto. Pareho ang atensiyon na ibinibigay niya sa dalawa at pareho raw itong deserving na manalo.

“Mahal ko po ng patas sina Darren at Lyca,” sey niya.

Makakatunggali nila ang Team Bamboo na si Juan Karlos Labajo at ang Team Lea na si Darlene Vibares.

Isa sa apat na ito ay nakatakdang manalo ng house and lot na kaloob ng Camella Tierra Nevada. Nakatutuwa ang mga bata dahil may pangarap na sila ‘pag napasakanila ang naturang bahay.

Ayon kay Darlene, ‘pag nanalo siya ng bahay, palalagyan daw niya ang kuwarto niya ng Hello Kitty. ‘Yung kuwarto raw ng ate niya, palalagyan niya ng wall paper ng crush niya. Si Lyca naman ay doon daw siya magce-celebrate ng birthday at magpa-party sa loob ng bahay. Si Darren naman ay ise-set up daw ang room niya tapos invite niya ang mga friend para mag-swimming. Si Juan Karlos naman ay gagawin daw niyang kulay white ang kuwarto niya. Favorite niya kasing kulay ay puti.

Talbog!