HATAW! D'yaryo ng Bayan hatawtabloid.com
Maricris Valdez Nicasio
BAGO pa man ipalabas ang The Voice Kids ng ABS-CBN noong Sabado, Mayo 24, alam naming maghi-hit agad ito at marami ang tiyak na tututok. Paano naman, teaser pa lang nito’y marami na ang nasabik sa mga batang nagpatikim ng kanilang galing sa pagkanta.
Kaya tinutukan talaga ng buong bansa ang unang batch ng young artists na nagpakitang gilas at nagpabilib sa coaches na sina Sarah Geronimo, Bamboo, at Lea Salonga sa Blind Auditions ng programa.
Sa datos ng Kantar Media, ang The Voice Kids ang pinakapinanood na programa sa bansa noong weekend. Noong Sabado (Mayo 24), pumalo ito sa national TV rating na 33.3%, o 21 puntos na mas mataas kompara sa Vampire Ang Daddy Ko ng GMA na nakakuha lamang ng 11.9%.
Namayagpag din ito noong Linggo (Mayo 25) sa rating na 35.8% at pinataob ang kalabang programang Kapuso Mo, Jessica Soho (15.8%).
Bukod diyan pinag-usapan din online ang premiere telecast ng programa dahil nanguna sa listahan ng worldwide trending topics ito sa Twitter sa parehong Sabado at Linggo sa hashtag na #TheVoiceKidsPhilippines.
Nag-trend din nationwide at worldwide ang iba’t ibang artists at awiting napakinggan sa programa.
Siyam na young artists na ang nakapagpaikot sa chairs ng coaches, at tiyak na mas titindi pa ang tensiyon sa kanila. Mayroon nang dalawang young artists na pasok sa Team Sarah, apat sa Team Bamboo, at tatlo naman sa Team Lea.
Kaya muling abangan ngayong Sabado at Linggo kung sino-sino pa ang papasa sa panlasa at pandinig ng tatlong coaches. Huwag ding bibitiw sa pagpili para sa kauna-unahang The Voice Kids na maraming papremyo ang naghihintay kasama na riyan ang house and lot mula sa Camella Homes ng Vista Land na ang chairman ay si Mr. Manny Villar. Bongga ‘di ba, sa bahay at lupa pa lang, panalo na agad!
