HATAW! D'yaryo ng Bayan hatawtabloid.com
ni Maricris Valdez Nicasio
NAKATUTUWA ang grabeng suporta ng fans nina Coco Martin at Sarah Geronimo. Balita kasi nami’y mayroon silang block screening ng pelikulang Maybe This Time ng Star Cinema at Viva Films na mapapanood na sa mga sinehan sa Mayo 28.
Marami na kasi ang excited na mapanood ang dalawa na maraming bago ang makikita sa pag-arte ni Sarah at sa hitsura naman ni Coco sa pelikulang ito. Ibang Sarah at ibang Coco nga raw ang mapapanood. Kung ano ang tinutukoy namin ay go na lang tayo sa mga sinehan.
Anyway, nagsama-sama nga ang 11 grupo na fans ni Coco para sa tatlong block screening sa Mayo 31 (Sabado) sa Podium Cinema at Galleria Cinema. At balita namin, may mga naka-sched pang block screening na habang isinusulat ito’y inaayos pa ng iba’t ibang kampo.
Bukod sa block screening, may mall tour pa ang dalawang bida ng Maybe This Time. Sa Sabado, nasa SM Fairview, SM Lazaro, at Lucky China Town sila at sa Linggo nama’y nasa Glorietta Mall sila at Ayala Alabang.
Punumpuno nga ang sched ng dalawa na habang pinakikinggan nami’y kami na mismo ang hindi makahinga sa rami at sunod-sunod na sched. Paano’y may promo rin sila sa iba’t ibang show ng ABS-CBN. Tulad sa Linggo, na may personal appearance si Sarah para sa Aling Puring Convention, pagkaraan ay may production number sila ni Coco sa ASAP, tapos ay sigue sila sa isang fashion show sa 25th anniversary ng Star Magic, at pagkatapos nito’y sa The Buzz naman. After The Buzz tuloy sila sa dalawang mall show.
Ang Maybe This Time ay parte pa rin ng ika-20 anibersaryo ng Star Cinema nito ngayong summer. Bale ang pelikulang ito ang pinaka-malaking romantic film ng season.
Idinerehe ito ni Jerry Lopez Sineneng at isinulat nina Anton Santamaria at Melai Monge. Ang Maybe This Time ay isang love story na nakasentro kina Steph Asuncion (Sarah) at Tonio Bugayong (Coco). Magkaibang-magkaiba sina Steph at Tonio ngunit pareho nilang iniibig ang isa’t isa. Dala ng mga pangyayari na hindi nila kontrolado, napilitan ang dalawa na maghiwalay at magkanya-kanya. Subalit, magkikita sila matapos ang maraming taon upang tapusin ang mga bagay na kanilang iniwan hinggil sa kanilang nakaraang relasyon. Ito na ang mga tagpong kapana-panabik na may mga magagandang batuhan ng linya tulad ng nag-trending na “There was never an us” na feel na feel na sinabi ni Sarah kay Coco. Biro nga ng iba parang real life ang pagbato ng linyang iyon ni Sarah. Kanino naman kaya?
Kaya sa Mayo 28, lasapin ang pag-ibig at romansa sa mga sinehan at mainlab ngayong buwan ng Mayo na siyang magiging bagong buwan ng mga puso sa piling nina Coco at Sarah.
