HATAW! D'yaryo ng Bayan hatawtabloid.com
ni Maricris Valdez Nicasio
STAR studded at matagumpay ang katatapos na Pep List 2013 awards night ng Philippine Entertainment Portal na isinagawa sa Solaire Resort and Casino noong Martes. Ito rin ang awards night na nagsama-sama ang mga artistang mula sa Kapamilya, Kapuso, at Kapatid Network. Kumbaga, naisantabi muna ang network war.
Sina Ai-Ai delas Alas at Lucy Torres-Gomez ang nagsilbing host ng gabing iyon samantalang livestream hosts naman sina Giselle Sanchez at Candy Pangilinan.
Sa 52 awards na ipinamigay ng PEP, pinakanag-ningning ng gabing iyon si Kim Chiu dahil siya ang may pinakamaraming award na nakuha tulad ng Newsmaker of the Year (Female), Celebrity Pair of the Year (with Xian Lim), at TV Star of the Year.
Kahanga-hanga naman ang pagkapili nila kina Joey de Leon at Nora Aunor bilang Showbiz Treasure (Male and Female) dahil tunay na kayamanan ang dalawa ng industriya ng showbiz. Bongga nga ang speech ni Joey nang tanggapin ang tropeo dahil nakaisip agad ito ng pagpapatawa patungkol sa bagong ineendoso ngayon ni Ai Ai na ‘pussykip’ o Femilift.
Kumbaga, siya ang nagpa-light ng awards night na ‘yon dahil biling-bili ang pagpapatawa niya. Hindi naman nakarating si Ate Guy para personal na tanggapin ang tropeo.
Magkakasabay na dumating ang Dabarkads sa pangunguna ni Ms. Malou Choa-Fagar, ang ladyboss ng Eat Bulaga na itinanghal na TV show of the Year (Daytime) kasama si Ryzza Mae Dizon na may award din bilang Child Star (Female). Kasama rin ng grupo sina Allan K., Paolo Ballesteros, at Ruby Rodriguez, at si Joey.
Dumating din si James Yap na siyang Newsmaker of the Year (Male); Tom Rodriguez (Breakout Star of the Year) at Dennis Trillo (Celebrity Pair of the Year kasama si Tom), Xian Lim (Fab Star Male); Lovi Poe (Fab Star Female).
Hindi naman dumating kapwa sina Claudine Barretto at Raymart Santiago para tanggapin ang award na Newsmaker of the Year (Male and Female) sa The Punongbayan and Araullo-Audited Category Winners.
Sa bumubuo ng Pep List ng PEP na pinamumunuan ng kanilang editor in chief na si Ms. Joan Maglipon, congratulations!!! Mabuhay po kayo.
