Alwyn, sasabak na sa professional boxing, haharap na sa mga totoong boksingero

ni  Maricris Valdez Nicasio

ABA, talagang desidido na si Alwyn Uytingco na maging isang magaling na boksingero. Paano naman, sasabak na siya sa ring ng professional boxing kaya hindi dapat palagpasin ang episode na ito ng Beki Boxer ngayong Biyernes (May 2).

Matapos kasing magtagumpay si Coach Dalmacio (John Regala) sa kanyang masasamang plano sa pamilya ni Rocky Ponciano (Alwyn), mapipilitan si Rocky na agad sumabak sa mas palaban at mas komplikadong mundo ng professional boxing. At kahit pa mas nalalapit si Rocky sa kanyang misyon na maging isang world-class champion boxer, mas titindi naman ang mga pagsubok na kakaharapin sa panibagong yugto ng kanyang boxing career.

Kilala bilang ‘The Tsunami’ sa mundo ng Beki Boxer dahil na rin sa kanyang signature tsunami punch, makakaharap ni Rocky ang real-life boxing legend at WBC Silver World Champion Denver ”The Excitement” Cuello.

Si Cuello, 27, ay may record na 33 wins na 21 ang knockouts. Gaganap ang Ilonggo boxing champ bilang Marvin ‘The Hammerhead’ Ortega. Isa lamang si Cuello sa listahan ng mga totoong boksingerong makakaharap ni Alwyn sa ring.

Kaya’t huwag palampasin ang maaksiyong bakbakan sa Beki Boxer ngayong Biyernes, 7:00 p.m. bago ang Confessions Of A Torpe sa TV5!