HATAW! D'yaryo ng Bayan hatawtabloid.com
ni Maricris Valdez Nicasio
TIYAK na matutuwa ang mga tumatangkilik sa Kapamilya child stars na sina Andrea Brillantes at Raikko Mateo dahil nagsama ang dalawa para turuan ng mahahalagang aral ang buong pamilya sa pagsisimula ng Wansapanataym special ngayong Sabado na pinamagatang My Guardian Angel.
Mula sa natatanging pagganap ni Andrea sa Annaliza at ni Raikko sa Honesto, gagampanan naman ng dalawa sa pinakasikat ng child stars ng kanilang henerasyon ang mga karakter ng mabait na batang si Ylia (Andrea) at anghel na si Kiko (Raikko).
Sa kagustuhan niyang makuha ang atensiyon ng mga magulang, handang gawin ni Ylia ang lahat para maramdaman ang pagmamahal ng mga ito. Lingid sa kanyang kaalaman ay binabantayan at tinutulungan siya ng guardian angel niyang si Kiko upang makuha ang kanyang mga kagustuhan.
Paano magbabago ang buhay ni Ylia kapag nakilala at nalaman niya ang tunay na katauhan ni Kiko? Mukukuha na ba niya ang inaasam na atensiyon at pagmamahal mula sa kanyang nanay at tatay sa tulong nito?
Makakasama nina Andrea at Raikko sa My Guardian Angel sina Mylene Dizon, Ejay Falcon, Ketchup Eusebio, Ruby Rubi, Gerard Pizarras, Abby Bautista, Racquel Pareño, Lui Villaruz, Dale Badillo, at Vangie Martell. Ito ay sa ilalim ng panulat ni Joel Mercado at idinirehe ni Jon ‘Sponky’ Villarin.
Huwag palampasin ang pagsisimula ng month-long special nina Andrea at Raikko sa Best Development-Oriented Children’s Program ng 2014 Gandingan Awards, Wansapanataym, pagkatapos ng Bet On Your Baby sa ABS-CBN. Para sa karagdagang updates, mag-log on sa www.abs-cbn.com o sundan ang @abscbndotcom sa Twitter.
