Julia, iginiit na ‘kuya’ ang turing kay Sam

 ni  Roldan Castro

DAHIL sa pag-iwas ni Jasmine Smith Curtis na magbigay ng pahayag sa confrontation umano ng ate niyang si Anne Curtis at ng rumored boyfriend niyang si Sam Concepcion, napapaisip tuloy ang madlang people na confirm ito. Kahit kasi si Sam ay nakabibingi ang pananahimik.

Kung hindi totoo ang nangyari ba’t hindi maipagtanggol ni Sam si Anne lalo’t ate ito ng girlfriend niya? Bakit hindi makasagot ng diretso si Jasmine? Mabilis lang naman ang pagsasabi ng NO.

Ang lumalabas ngayong anggulo ay sinita umano ni Anne si Sam dahil nail-link kuno si Sam sa co-star niya sa Mirabella na si Julia Barretto. May lumalabas pang isyu na pinagseselosan umano ni Jasmine si Julia.

True ba ‘yun?

Umiwas na naman si Jasmine at hindi raw niya isyu ‘yan para magsalita. Hindi raw niya alam kung saan nanggagaling ang balitang ‘yan at kung bakit nakaladkad ang pangalan ni Julia. Kung ano raw ang pinaniniwalaan ng tao, bahala na sila.

Anyway, sa huling panayam kay Julia, pinabulaanan niya na may namamagitan sa kanila ni Sam. Kuya lang daw ang turing niya rito.

‘Yun na!