HATAW! D'yaryo ng Bayan hatawtabloid.com
ni Maricris Valdez Nicasio
MARAMING negatibong reaksiyon ang naririnig namin simula nang ihayag ni Kris Aquino ang ukol sa pangliligaw ni Mayor Herbert Bautista sa kanya.
Marami ang nagsasabing sana’y walang nasisirang pamilya sa ligayang nararamdaman ngayon ni Kris.
Subalit, nakarating sa aming kaalaman na mag-aalsa balutan na ang dalawang anak ni Bistek kay Tates Gana. Magtutungo na raw ito sa ibang bansa.
Napanood daw kasi ng dalawang bata, sina Athena, 17 at Harvey 10 ang binasang statement ni Kris na nang mga oras na iyon ay nasa Boracay ang mag-iina. Masyado raw naapektuhan ang dalawang bata, ayon sa malapit sa mag-iina, kaya naman agad-agad ay gustong umalis ng Pilipinas.
“Sobrang apektado ‘yung dalawang bata kaya gusto nilang umalis ng ‘Pinas. Pupunta na lang daw sila sa abroad,” kuwento sa amin.
Nang kumustahin naman namin si Tates, ang isinasagot daw nito sa mga nagtatanong ay ‘okey siya’.
