HATAW! D'yaryo ng Bayan hatawtabloid.com
ni Maricris Valdez Nicasio
FIRST choice pala si Aiko Melendez ni Direk Louie Ignacio para gumanap sa indie film na Asintado. Kaya naman maituturing na big screen comeback ito ng magaling na aktres.
Bale, first Cinemalaya entry din ito ni direk Louie na hindi naman masusukat ang galing sa pagdidirehe. Kung makailang beses na rin namang kinilala ang husay ni Direk Louie sa pagdidirehe ng mga TV special, TV shows, at MTV.
Samantalang si Aiko ay excited naman sa pagtanggap ng Asintado dahil entry ito saDirector’s Showcase category ng Cinemalaya Independent Film Festival na magpe-premiere sa Agosto.
Bale gagampanan ni Aiko sa Asintado ang role ng isang inang nangangailangang gumawa ng isang napakahalagang desisyon para sa kanyang mga anak, ang magliligtas sa buhay ng kanyang anak pero siya namang magiging sanhi rin ng pagiging criminal ng isa pang anak. Kaya naman tiyak na makikitang muli ang napakagaling na acting ng aktres sa pelikulang ito.
Malaking challenge rin ito sa kakayahan ni Aiko bilang aktres.
Ayon nga kay Aiko nang makausap namin ito sa story conference ng Asintado, ”Ang ganda ng script. When I first read it, hindi ko na binitawan. Akala tuloy ni Direk Louie ayaw ko gawin kasi hindi ko agad siya tinawagan na I am accepting the role.”
Makakasama ni Aiko sa Asintado sina Gabby Eigenmann, Jake Vargas, Rita de Guzman, Rochelle Pangilinan, at Miggs Cuarderno.
Sa kabilang banda, inamin ni Aiko na mahal pa rin niya ang ex-husband na si Jomari Yllana. Pero nilinaw naman niyang hindi raw iyon ‘yung klase ng pagmamahal in a romantic way.
“Mahal ko si Jom pero hindi ko pa siya nakikita on a romantic level. Mahal ko siya dahil siya ang tatay ng anak ko,” saad pa ni Aiko.
