HATAW! D'yaryo ng Bayan hatawtabloid.com
ni Maricris Valdez Nicasio
NATUWA kami sa imbitasyon ni katotong Jobert Sucaldito noong Biyernes, ang QC Grand JS Prom na ginawa sa Tropical Garden QC Memorial Circle dahil panauhing pandangal doon ang Mayor ng Quezon City na si Herbert Bautista. Inaasahan naming makaka-usap ito ukol sa pag-uugnay sa kanila ni Kris Aquino.
Subalit, tulad ng dati, ngiti at pa-cute lang ang aming natanggap na sagot sa butihing Mayor. Kaya naman nagkakatawanan na lamang ang mga entertainment press na inimbitahan sa naturang okasyon. Sa haba ng tanong at dami, wala ni isa itong sinagot.
Talagang hindi pa rin nagbabago si Bistek pagdating sa kanyang lovelife. Talagang napaka-private pa rin nito. Kaya ang inaasahan naming scoop na makukuha ay nawala. Pero pagdating sa pamamalakad sa Quezon City, asahan mong milya-milya ang isasagot nito.
Anyway, matagumpay ang ginawang QC Grand JS Prom na ang tema ay Heroes Making Bridges For The Future. At kahit super abala ang mayor ng QC ay naroon iyon para makiisa at makisaya sa mga kabataang dumalo sa pagtitipon.
Nakihalubilo si Mayor Bistek sa mga kabataan at kitang-kita ang pagkagiliw niya sa mga ito, kaya hindi kataka-takang maging idolo siya ng mga kabataan.
At kaya pala magaling makipagkapwa si Herbert, napag-alaman naming mayroon siyang Masters in Public Admin sa UP at Masters in National Security Administration sa Natonal Defense College. Bongga ‘di ba?
