HATAW! D'yaryo ng Bayan hatawtabloid.com
HUSTISYA ang hinihingi ng mga kaanak ng 18-anyos na dalaga matapos barilin ng lalaking ka-eyeball na nakilala lamang sa facebook sa Valenzuela City kamakalawa ng hapon.
Dead on arrival sa Valenzuela General Hospital (VGH) ang biktimang kinilalang si Cheryll Dacillo, 18-anyos, ng Brgy. Langka, Meycauayan, Bulacan sanhi ng isang tama ng bala ng kalibre .45 sa ulo.
Pinaghahanap naman ng mga awtoridad ang suspek na si Cedric Martin, 19-anyos, residente ng Pangkera St., Brgy. Coloong I ng lungsod na mabilis tumakas matapos ang pamamaril.
Sa ulat ng pulisya, naganap ang insidente dakong 4:00 kamakalawa ng hapon sa bahay ng suspek sa nasabing barangay.
Nauna rito, nakilala umano ng biktima sa facebook ang suspek at kamakalawa ng hapon ay nagkasundo ang dalawa na magkita sa bahay ng suspek.
Kasama ang isang kaibigan ay nagtungo si Dacillo sa bahay ni Martin at doon ay pumasok sila sa kuwarto hanggang isang putok ng baril ang narinig at nakita na lamang na duguan na ang katawan ng dalaga.
Nagawa pang isugod sa pagamutan ang biktima ngunit hindi na umabot nang buhay habang mabilis na tumakas ang suspek.
ni rommel sales
