HATAW! D'yaryo ng Bayan hatawtabloid.com
IKINAKASA na ang grand welcome para kay 2013 Miss World Megan Young.
Sinabi ni Miss World Philippines National Director Cory Quirino, isang grand homecoming ang mangyayari sa susunod na linggo para sa actress-breauty queen.
Walong araw pa aniya bago makabalik sa Filipinas si Young.
Paliwanag ni Quirino, kagabi ay agad lumipad ng London ang 23-year old beauty queen dahil kailangan niyang dumalo sa isang malaking charity gala.
Bukod dito, naghihintay na rin ang British at international press kay Megan sa London.
Tiniyak aniya ng Miss World Organization na pagkatapos ng event sa London, bibigyan ng sapat na oras si Young para makasama ang mga kababayan.
Ayon kay Quirino, may sapat na oras pa para mapaghandaan ang engrandeng pagsalubong kay Megan na umano’y magiging isang malaking fiesta sa Filipinas.
Ang Fil-Am na si Young ang kauna-unahang Filipina na nakapagbigay ng Miss World title sa bansa sa 63 taon ng pageant.
Una rito, sinabi ni Young na sabik na siyang gampanan agad ang kanyang Miss World duties.
Sinabi ni Young na gusto niyang makapag-ikot agad sa mga bansa para isulong ang adbokasiya ng pageant.
Bagama’t hindi pa raw niya alam kung ano ang unang bansang kanyang pupuntahan.
