Totoy patay sa kuyog ng 5 Rugby boys

BACOLOD CITY – Patay ang 6-anyos batang lalaki matapos pagtulungang bugbugin ng rugby boys sa lungsod ng Talisay, lalawigan ng Negros Occidental.

Binawian ng buhay si Joemarie Sarmiento ng Brgy. Zone 9, Talisay City bunsod ng malubhang sugat sa ulo matapos limang beses hatawin ng dos por dos na may pako, sinuntok ng tatlong beses sa mukha at tinalian ng electric wire sa mga kamay.

Isinugod sa pagamutan ang biktima nang natagpuan ng ilang residente na walang malay ngunit idineklarang dead on arrival.

Nahuli ang tatlo sa limang mga salarin na pawang menor de edad na kinilala sa kanilang mga palayaw na sina John Mark, 14; Jay-r, 11; at Rap-rap, 9; habang patuloy na pinaghahanap ang isang alyas Rommel at ang itinuturong mastermind na si Raffy Hinolan, 19.

Batay sa salaysay ni John Mark, sumisinghot sila ng sealant sa bakanteng lote malapit sa bahay ng biktima ngunit kanilang nakita si Sarmiento na pumunta sa lugar upang magbawas.

Nilapitan nila ang biktima at pinagpapalo sa ulo ng dos-por-dos na may pako saka pinagsusuntok hanggang nawalan ng malay.

Inamin ng grupo na napagtripan lamang ni Hinolan ang biktima.

HATAW News Team