Katarungan para sa SAF 44

DAPAT iwaksi ng mga mambabatas ang politika sa reinvestigation ng Mamasapano incident.

Pinakamabuti na magkaisa ang mga mambabatas sa paghahanap ng katarungan para sa 44 Special Action Force (SAF) commandos na napaslang sa malagim na trahedya.

Sabi nga ni Senador Bongbong Marcos, hindi dapat maging partisan issue ang Mamasapano massacre tulad ng paratang ng ilang kampo.

Ang ultimong layunin nito ay maigawad ang katarungan sa 44 SAF commandos.

Ani Marcos, “Dapat maintindihan ang trahedya para makamit ang katarungan at masiguradong hindi na ito mauulit.”

Sana nga ay ganito rin ang nasa isip ng mga mambabatas na papasok sa reinvestigation ng Mamasapano incident.

Alam natin na maraming desmayado lalo na ang pamilya ng mga biktima sa pagsasara ng imbestigasyon nito noong nakaraang taon.

Kaya ang muling pagbubukas nito ay maaaring pagkakataon para malaman ng publiko ang tunay na pangyayari sa Mamasapano incident.

Kung mayroon man dapat parusahan para maigawad ang katarungan sa SAF 44, pinakamabuting hindi ito mahaluan ng kulay-politika.