Barako Bull nanunuwag

KAHIT na tila hindi naman ganoong kalakas ang line-up ng Barako Bull, aba’y  nakapagbibigay ng magandang laban ang Energy sa mas matitinding kaharap.

Isang halimbawa na lang ang naganap noong Linggo sa Ynares Sports Center sa Antipolo City kung saan nakaharap nila ang defending champion San Miguel Beer.

Aba’y  muntik na nilang masilat ang Beermen kungdi lang sa last second shot ni Arwind Santos na nagbigay sa San Miguel ng 106-105 panalo.  Nagwakas tuloy ang two-game winning streak ng Energy na bumagsak sa 3-3.

Pero magandang simula na rin ito para sa Barako Bull considering na mas nakaaangat pa sila sa ibang koponang may malakas na line-up. Hindi nga inaasahahang makakapanakot ang Energy, e.  Sa simula ng torneo nga ay sinasabing baka mangulelat pa ang koponang itro.

Pero hindi naman hahayaan ni coach Koy Banal na magkawindang-windang ang kanyang koponan at ang tsansa nila. Kahit na salat sa matitinding manlalaro ay nareremedyuhan ni Banal ang sitwasyon.

Sino ba naman ang mag-aakalang mapahihirapan nila ang Beermen na pinamumunuan ng two-time Most Valuable Player na si June Mar Fajardo?

E sino ba naman ang puwedeng itapat ng Barako Bull kay Fajardo?

Bale si Mick Pennisi lang ang matatag na puwedeng itapat. Hindi na ito bata. Hindi naman puwedeng gamitin nang husto ang mga rookies na sina Michael Miranda at Tutien Andrada dahil kakainin sila ng buong-buo ni Fajardo.

Ang maganda dito sa Barako Bull ay ang pangyayaring ang mga manlalaro nito ay tila nais na magpakitang-gilas matapos na ipamigay sila ng kani-kanilang koponan. Pagkakataon na nilang magkaroon ng mahabang playing time at maipakitang ubra naman silang maging star sa PBA kung bibigyan ng pagkakataon.

Iyon marahil ang dahilan kung bakit nakakapanakot ang Energy.

 

SPORTS SHOCKED – Sabrina Pascua