MFH ng GMA, mapapaaga ang pagtatapos dahil talong-talo ng OTWOL

TAWANG-TAWA kami sa pagiging candid ni Direk Joyce Bernal sa sinabi niyang, “oo, talo nga kami (ratings game) ng ‘OTWOL’ (On The Wings Of Love).”

Ang OTWOL ang katapat ng My Faithful Husband na seryeng idinidirehe ni Joyce sa GMA 7. At ang direktor naman ng kilig-seryeng katapat ay si Antoinette Jadaone na rating personal assistant niya.

Sabi ni direk Joyce tungkol kay direk Tonet, “natutuwa ako for her, proud ako para sa kanya.”

At dahil talo sa ratings game ang MFH ay tinanong namin kung hanggang kailan na lang ito, “bago mag-December yata o December, not sure, eh. Oo talo kami sa ‘OTWOL’ kaya magba-babu na kami, ha, ha, ha, ha,” tumatawang sabi pa ni direk Joyce nang makatsikahan namin pagkatapos ng premiere night ng The PreNup nina Sam Milby at Jennylyn Mercado handog ng Regal Entertainment na idinirehe naman ni Jun Robles Lana.

Masarap talagang kausap si direk Joyce dahil hindi siya showbiz at wala siyang pakialam kung nagri-rate o hindi ang programa niya dahil katwiran niya, anong magagawa niya kung ayaw kagatin ng tao.

Nabanggit din ni direk Joyce na planong i-extend sana ang MFH, pero hindi na raw puwede dahil lalaylay na.

FACT SHEET – Reggee Bonoan