Holdaper patay, parak 1 pa tiklo sa Pampanga

CAMP OLIVAS, Pampanga – Arestado ang isang pulis at isa pa niyang kasamahan habang patay isa pang holdaper makaraan manlaban sa nagrespondeng mga awtoridad sa Gabalndon, Nueva Ecija kamakalawa ng hapon.

Batay sa ipinadalang report kay Central Luzon OIC, Chief Supt. Ronald Santos, kinilala ang mga suspek na sina PO1 Alvin Belmonte, 38, ng Palayan PNP, residente ng Sta. Rosa, at Reynaldo Gozon, 45, ng Rizal, kapwa ng Nueva Ecija.

Habang agad binawian ng buhay ang isa nilang kasama na hindi pa nakikilala.

Ayon sa Gabaldon PNP, bandang 4:30 p.m. nang makatanggap ng tawag ang himpilan ng pulisya hinggil sa naganap na pagholdap sa isang Isuzu closed van (RKF-339) na kargado ng Mighty Marvel cigarettes.

Sa isinagawang ‘Lambat Sibat’ operation, natunton ng mga operatiba ang mga suspek sa Dupinga River at naganap ang palitan ng putok na nagresulta sa pagkamatay ng isang suspek at pagkahuli kina Belmonte at Gozon.

Narekober mula sa mga suspek ang .45 cal. at .38 cal., at mga bala, malapad na scotch tape, at iba’t ibang ID.

Nabawi rin ng pulisya ang hinoldap na Izusu closed van.

(RAUL SUSCANO)