HATAW! D'yaryo ng Bayan hatawtabloid.com
KAMAKALAWA, sinampahan ng P1.560 bilyong plunder case ang mag-amang Vice President Jejomar Binay at incumbent Makati City Mayor Erwin Jejomar Binay.
Kasama rin sa mga inasunto ang mga konsehal ng siyudad sa kasong inihain sa Ombudsman.
‘Yan ay dahil sa kaduda-dudang pagpapagawa ng Makati Parking building na itinuturing ngayong most expensive parking building sa buong bansa.
Mantakin ninyo P1.560-bilyon parking building na ginawa sa loob ng pitong taon?!
What the fact!?
Ayon sa mga complainant na sina Atty. Renato L. Bondal at Ching Enciso, lead convenor ng Save Makati Movement, inakusahan nila ng plunder ang mga opisyal dahil sa kaduda-dudang transaksiyon sa pag-utang sa Land Bank of the Philippines at proseso sa pagpapagawa na umabot nang halos pitong taon gamit ang serye ng mga city council ordinance nang hindi batid ng mga ordinaryong residente ng Makati City.
Ang Makati Parking Building ay 11-storey, 31,928-square meter building na unang pinaglaanan ng P400 bilyon budget ng matandang Binay.
Bukod sa mag-amang Binay, kabilang sa kinasuhan ang mga konsehal na nagsilbi mula 2007 hanggang 2013 na sina Arnold Magpantay; Romeo Medina; Tosca Puno Ramos; Maria Alethea Casal-Uy; Ma. Concepcion Yabut; Virgilio Hilario; Monsour del Rosario; Vince Sese; Nelson Pasia; Salvador Pangilinan; Elias Tolentino; Ruth Tolentino; Henry Jacome; Leo Magpantay; Nemesio “King” Yabut; Armand Padilla; Israel Cruzado; Ma. Theresa De Lara; Angelito Gatchalian at Ernesto Aspillaga.
Kasamang kinasuhan si Cecille Caganan, COA resident auditor dahil sa kabiguan na bantayan nang maayos na proseso ng naturang transaksiyon.
Naniniwala sina Bondal at Enciso na dapat managot ang mag-amang Binay at ang mga konsehal sa nasabing kaso ng pandarambong.
Malinaw umano na kaso ng OVERPRICING ang halagang P1.56 bilyon na mas nararapat na ilaan sa mga batayang serbisyo gaya ng edukasyon, kalusugan at pabahay.
Hindi man tayo bilib kay Binay bilang isang politiko, pero minsan natin siyang hinangaan dahil sa pagmamantina niya ng BINAY POWERS sa Makati City.
Nakabibilib na lahat ng anak niya ay naiupo niya sa ehekutibo at lehislatura.
Isang tunay na huwaran talaga ng political dynasty, ‘di po ba?
Nasalag nila ang maraming pagkondena at black propaganda habang pinagtitibay ang kanilang baluarte sa financial district ng bansa.
Hindi ko inakala na isang araw ay tatamaan sila nang ganito kabigat na kaso.
Sabihin man natin na pamomolitika ang asuntong ito, pero kung mayroong matibay na ebidensiya, ‘e baka dito na ma-swak ang mga Binay.
Parang naririnig na natin ang sinasabi ni Mar Roxas … “Good riddance Jojo B.”
MGA MAHISTRADO NG SC NALILIGO BA SA MINERAL WATER?
Tuliro na raw ang Commission on Audit (COA) kung paano ipapaliwanag sa taong bayan ang kanilang natuklasang report mula sa Korte Suprema.
Hindi raw maintindihan ng COA kung saan galing ang pondo na ipinagpatayo o ibinili ng dalawang water purifying refilling station.
Ayon sa COA Report 2013, bumili ang Korte Suprema ng dalawang water purifying refilling station sa halagang 1.1 milyon na hanggang ngayon ay hindi pa raw naa-account? Nasaan ang resibo ng pagkakabili ng dalawang makina?
Natatandaan n’yo ba ‘yung JDF o Judiciary Development Fund na kinokolekta ng husgado sa tuwing magsasampa ng kaso si Juan dela Cruz? Na-inalmahan ng marami dahil na taas ng halaga, maging ang docket fee o filing fee ng kaso, diyan din umano galing ang budget na ipinambili ng water purifying refilling station.
What the fact!?
Magkagayonman, kung talagang kailangan nga ng mga kagalang-galang na mahistrado ng Korte Suprema (para sa kanilang kalusugan ) na magkaroon ng sariling water refilling station, hindi naman siguro aabot sa halagang P1.1 milyon ang halaga nito.
Batay sa tumatakbong presyo o halaga ng isang water refilling station ay nagkakahalaga lamang ng P300,000 ang isa.
Mukhang may hindi malinaw sa sitwasyong ito. Ano nga bang mayroon ang water refilling station na ‘yan at ganoon kamahal?
Kuwentahin naman natin ang magagastos kung hindi sila bumili ng water refilling station.
Ang halaga ng isang container na inuming tubig sa mga water refilling station ay umaabot sa P30 bawat isa, ‘di po ba?
Ang bawat isang container ay may 15 litro ng tubig, samakatuwid kung labing-lima (15) ang mahistrado ‘e isang container ang masasaid nila sa bawat araw. Tama ba?
Sa loob ng isang taon na 365 araw (kasama ang Sabado’t Linggo at piyesta opisyal) aabot sa halagang 36,500.00 sa isang taon.
Aabutin ng mahigit 41 taon ang pagkunsumo ng bawat isang container na refilled water bago maubos ang P1.5 milyon.
Kung susundan natin ang COA report hindi pa nakasaad doon ang maintenance, paglalagay ng tao o empleyado na mag-aayos at magme-maintain nito (kung masisira), ang kukunsumohing tubig (na babayaran din nila dahil kailangang bumili rin ng tubig mula sa MWSS at koryenteng gagamitin at iba pa.
Tama ba ang kuwentada natin?
Tanong lang naman natin, tama ba na bumili ng water refilling station o bumili na lang sa labas (outsource) ng tubig?
Ano nga ba ang tama at makatuwiran?
Tandaan natin na ang pinag-uusapan dito ay salapi ng bayan, maging galing sa buwis o sa koleksyon nila ng pondo. Mga pantas sa batas ang mga mahistrado natin, ang batas ay siyensa ng lohika at tamang katuwiran.
Papaano ba ‘to Justice?
Nasaan ang transparency at accountability?
Ipakita nga ninyo sa taong bayan kung papaano ginastos ang P1.1 milyon para sa dalawang (2) water refilling station nang sa gayon ay maabsuwelto kayo sa taong bayan.
‘Yun lang po!
Para sa mga reaksiyon, suhestiyon, reklamo at sumbong, magtext sa 0915.804.76.30 o mag-email sa [email protected]. Para sa mga nakaraang isyu ng BULABUGIN please visit https://hatawtabloid.com
