HATAW! D'yaryo ng Bayan hatawtabloid.com
MAY teorya na ang Bureau of Fire Protection (BFP) ng Taguig City hinggil sa posibilidad na naging sanhi ng sunog at pagsabog sa Explosive Ordnance Division (EOD) Battalion headquarters ng Philippine Army sa Fort Bonifacio sa Taguig City kamakalawa na ikinasugat ng 25 katao.
Sinabi ni Taguig City Fire Marshall C/Insp. Juanito Maslang, batay sa kanilang inisyal na imbestigasyon, bagamat wala pang malinaw na sanhi ng pagkasunog at pagsabog, ilan sa mga teorya na kanilang ikinokonsidera ay ang isinasagawang reloading.
Napag-alaman, ang nasabing lugar ay siyang reloading station ng EOD battalion partikular ng mga bala at iba pa.
Sinabi ni Maslang, nakitaan din nila na mayroong paglabag ang Army dahil ang storage room o ang imbakan ng mga baril, bala at pampasabog ay matatagpuan lamang sa iisang gusali na sana ay hindi dapat dahil labag ito sa firecode.
Ngunit iginiit ng pamunuan ng Philippine Army na hindi imbakan ng mga bomba, baril at bala ang nasabing lugar.
Itinanggi rin na reloading station ang lugar.
Ayon kay Maslang, makikipag-ugnayan sila sa EOD ng Army para sa pagpapa-tuloy ng imbestigasyon.
