RP U18 team inilabas na

PANGUNGUNAHAN ni Thirdy Ravena ang listahan ng mga manlalarong kasali sa RP team na sasabak sa FIBA Asia Under-18 Championships na gagawin sa Doha, Qatar, mula Agosto 19 hanggang 28.

Makakasama ni Ravena sa lineup na inilabas ni coach Jamike Jarin sina Andrei Caracut ng San Beda, Dave Yu ng Sacred Heart School ng Cebu, Aaron Black ng Ateneo, Richard Escoto ng Far Eastern University, Dawn Ochea ng Adamson at John Apacible at Jollo Go ng Hope Christian High School.

Si Ravena ay kapatid ng superstar ng Ateneo na si Kiefer Ravena samantalang si Black ay anak ng head coach ng Talk n Text sa PBA na si Norman Black.

Ayon kay Jarin, may iba pang mga manlalarong may pag-asang makapasok sa koponan.

Ang FIBA Asia U18 Championships ay gagawin pagkatapos ng FIBA Under-17 World Championship sa Dubai mula Agosto 8 hanggang 16.                (James Ty III)