1 patay, 3 sugatan sa ambush sa bus

CEBU CITY – Patay na nang ida-ting sa pagamutan ang isang lalaki matapos pagbabarilin habang lulan ng bus matapos bomoto sa Balud Elementary School sa bayan ng San Fernando, lalawigan ng Cebu pasado 12 p.m. kahapon.

Batay sa ulat, sumakay ang biktimang si Ariel Gomez, 22, sa mini-bus ng FM Liner (GXL-862) na ang ruta ay mula sa bayan ng Sibonga patungo sa lungsod ng Cebu.

Sinasabing ang biktima ay katatapos lamang bomoto sa kanyang presinto nang sumakay sa naturang bus.

Ayon kay Robert Delfin, 24, at konduktor ng bus, unang sumakay ang hindi nakikilalang suspek at sinundan naman ng biktima.

Ngunit ilang minuto matapos makaupo ang biktima ay bigla na lamang siyang pinagbabaril ng salarin gamit ang 9mm baril.

Aksidente namang natamaan ang mga pasahero ng bus na sina si Jomar Secretaria at Jintor Coronado na pawang kritikal ngayon ang kondisyon.

Habang ligtas na sa bingit ng kamatayan ang isa pang pasahero na si Rosemarie Navares.

Kaugnay nito, iginiit ni C/Insp Sarah Recla, hepe ng San Fernando Police Station. Anggulong personal na alitan ang tini-tingnang dahilan ng pagpatay at walang kaugnayan sa barangay elections.

Napag-alaman na ang biktima ay may kinakasama na kasal sa ibang lalaki.