HATAW! D'yaryo ng Bayan hatawtabloid.com
MAHIGIT kalahating milyong pisong halaga ng ari-arian at estruktura ang naabo nang masunog ang apat na silid-aralan sa ikalawang palapag ng isa sa mga gusali ng P. Burgos Elementary School sa Altura St., Sampaloc, Maynila.
Nabatid mula kay Fire Chief Inspector Jeffrey Gano ng Manila Fire Department, umabot sa ikatlong alarma ang sunog sa mga silid-aralan sa isa sa dalawang palapag na gusali na magsisilbing presinto sana sa halalan kahapon.
Dakong 10 p.m. kamakalawa ng gabi nang sumiklab ang apoy at ganap na naapula dakong 10:30 p.m.
Agad kumilos ang pamunuan ng paaralan upang maipatupad ang botohan na sinimulan 7 a.m. kahapon.
Sinabi ni Mrs. Julia Llabore, master teacher ng paaralan, kanilang inilipat sa iba pang silid aralan ang mga apektadong presinto upang matiyak na makaboboto ang mga residente sa barangay. (LEONARD BASILIO)
