Mga katutubo sa Gitnang Luzon buong suporta sa Aredumstrico

TIWALA at suportado ng mga katutubong Aeta at Remontado Dumagat ang mga programang pangkabuhayan ng non-governmental organization (NGO) na Aredumstrico na pinamumunuan ni Suprema Bae Kalikasan Lorilyn I. Tobias.

Dahil dito nagkaroon ng pakikipagpulong ang mga Tribal chieftain mula sa Zambales, Bulacan, at Bangsamoro sa tanggapan nito sa Brgy. Ulingao, San Rafael, Bulacan.

Hinimok ni Bae Kalikasan, ang mga Chieftain na palawakin ang pagtatanim ng Cacao, Guyabano, Café, at Rambutan sa mga lupain na sakop ng native title o ancestral domain para sa kanilang kabuhayan.

May 68 ektaryang lupain ng katutubo sa Tarlac at Bulacan ang maaring taniman ng fruit bearing trees at iba pang halaman, ayon kay Dumagat Tribal Chieftain Rodolfo Delfin aka Datu Bituin, mula sa Brgy. Camachin sa bayan ng Doña Remedios Trinidad (DRT) Bulacan.

Aniya, una silang nagtanim ng nasa 3,000 puno ng Cacao, habang si Aeta Tribal Chieftain Throlie Romualdo mula sa Olongapo – San Marcelino, Zambales, nasa 200 puno ng saging at puno ng niyog ang kanilang itinanim sa kanilang ancestral domain.

Samantala umapela si Bae Kalikasan sa mga Indigenous Peoples (IPs) sa Aurora, Nueva Ecija, Tarlac, Pampanga, Bulacan, Zambales, at Bataan.

Walang kinalaman o hindi konektado ang Aredumstrico Agricultural Forest Village Development Foundation Inc., sa anumang transaksiyon ng ‘United As One Peoples Organization’ at ‘United As One Sectoral Association.’

Kasunod nito’y muling ipinaalala na ang aplikasyon at koleksiyon para sa membership sa Tribal Village ay itinigil na base sa advisory noong 2 Hunyo 2025.

Kaugnay sa validation and update ng kanilang application bago ang nasabing petsa, maaari silang magsumite ng kanilang dokumento sa FB page na Tribal Village – SJDM. (MICKA BAUTISTA)