HATAW! D'yaryo ng Bayan hatawtabloid.com
ISANG kilalang negosyante ang pinagsasaksak nang mahigit 50 beses matapos pagnakawan sa kanyang tahanan sa isang subdibisyon sa Barangay Burol Main, Dasmariñas City.
Sa ulat ng PNP Region 4A nitong Martes, kinilala ang biktimang si William Tibayan, sakay ng kanyang Toyota Hilux Conquest papasok sa parking area ng kanilang bahay dakong 2:40 am nang biglang bumulaga ang tatlo lalaki, tinutukan siya ng baril saka pumasok sa loob ng sasakyan.
Pagpasok sa kanilang bahay, agad tinalian ng masking tape ang paa at kamay ng live-in partner ni Tibayan, kinilalang si Aniceta Nacua. Sinabing pinaghiwalay ng mga suspek sina Tibayan at Nacua.
Hinalughog ng mga suspek ang bahay at nilimas ang nasa P1,800,000 cash, mga mamahaling alahas, cellphones, at mahahalagang gamit sa loob ng bahay.
Hindi nakontento ang mga suspek, pinagsaksak ang negosyante nang mahigit sa 50 beses saka sila mabilis na sumakay sa sasakyan ng biktima na kanilang ginamit sa pagtakas.
Nang makaalis ang mga suspek, agad humingi ng tulong ang nakagapos na misis at dinala sa pagamutan ang biktima ngunit dahil sa rami ng saksak sa iba’t ibang bahagi ng katawan, ang biktima ay idineklarang dead-on-arrival.
Tinutugis ng pulisya ang mga suspek. (HATAW News Team)
