HATAW! D'yaryo ng Bayan hatawtabloid.com
NGAYONG kompirmado na ang kolaborasyon ng sikat na bandang Sunkissed Lola at ng nangunguna sa retailtainment, ang Puregold, hindi na mapakali ang mga tagasubaybay kung ano ang susunod na pasabog.
At tulad ng inaasahan, nagpatikim na ang Puregold ng video teaser na tila ipinakikita ang orihinal na musika mula sa mabilis na sumisikat na Pinoy Pop girl group, ang BINI. Dahil sa ipinakitang ito ng Puregold, daan-daang fans ang nag-comment ng kanilang pagkasabik.
Tinatawag na “nation’s girl group,” nabingwit ng BINI ang puso ng nakararami sa mga viral nitong kanta gaya ng Karera, Pantropiko, at Salamin na nangunguna sa mga chart at nakalikom na ng milyon-milyong stream sa iba-ibang mga plataporma. Kinabibilangan ng mga miyembrong sina Aiah, Colet, Maloi, Gwen, Stacey, Mikha, Jhoanna, at Sheena, repleksiyon ang BINI ng temang “coming-of-age”na danas ng napakarami nitong mga tagapakinig. Tampok sa mga kanta ng BINI ang mga kuwento ng pag-ibig na nagsisimula, pag-e-enjoy, pagiging malaya, at pagtanggap sa sarili–mga kaganapang itinuturing na mahalaga ng Puregold lalo na pagdating sa mga kuwentong panalo na itinataguyod nito–ang pagkamit ng tagumpay dahil sa abilidad na maging matatag at tanggapin ang mga pagkikilanlan.
Kamakailan, naglabas ang Puregold ng teaser ng orihinal na kanta ng SunKissed Lola, na nagdulot ng antisipasyon sa isang kantang magbibigay-inspirasyon na iangat ang sarili. Sa paglabas ng teaser ng BINI, may patikim na ang kanta sa paghihikayat naman sa mga tagapakinig na yakapin ang pagbabago at magtiwala sa sarili.
Patuloy na pasasabikin ng Puregold ang mga tagapakinig ng musika sa mas marami pang sorpresa na kaugnay ng proyektong ito. Nais ng Puregold na itaguyod ang Original Pilipino Music (OPM) at ang paglapit sa iba-ibang mga komunidad at uri ng musika. Sa pagsusumikap na ito, hangad ng Puregold na bigyang-diin ang mga kuwentong panalo ng mga talentadong musikero–at magbigay-inspirasyon sa mga Pilipino na tahakin ang kanya-kanyang daan tungong tagumpay.
Sa lahat ng ito, naghahanda na ang mga tagasubaybay ng Puregold sa mas marami pang kolaborasyon ng kompanya sa mga bigating Filipinong musikero, at nag-aabang ang mga nagmamahal ng musika sa mga bagong anunsiyo.
