Kelot utas sa 3 bala

TATLONG bala na ibinaon sa kanyang mukha at ulo ang umutas sa buhay ng isang lalaki habang nakikipag-usap sa isang kaibigan sa isang matao at magulong kalye sa Tondo, Maynila kahapon ng umaga .

Kinilala ang biktima na si Antonio Diaz, 24 anyos, walang asawa at walang trabaho, residente sa Block 8-B, Lot 11, Model Community, Tondo.

Sa ulat ni SPO1 Jonathan Bautista ng Manila Police District – Homicide Section (MPDHS), dakong 10:05 ng umaga kahapon, nakikipag-usap ang biktimang si Diaz sa kanyang kaibigan na si Mark Juny, 17-anyos, nang biglang lapitan ng suspek saka pinutukan sa mukha.

Tinangka umano ni Diaz na takasan ang suspek ngunit siya ay nadapa kaya muli pa siyang binaril sa ulo.

Agad tumakbo ang suspek papalayo matapos tiyakin ang kamatayan ng biktima sa pamamagitan ng dalawa pang putok sa ulo.

Kinompirma ang tatlong tama ng bala sa ulo ng biktima sa eksaminasyon ng mga imbestigador.

Itinakbo si Diaz sa Mary Johnston Hospital ngunit idineklarang dead on arrival dakong 11:55 am.

Pinaghahanap pa rin ng mga awtoridad ang suspek upang alamin ang motibo ng pamamaslang.

(DAPHNEY ROSE TICBAEN)