2 miyembro ng komunistang grupo sa Bulacan, sumuko

DALAWANG miyembro ng Rebolusyonaryong Hukbong Bayan (RHB) na isang Communist-Terrorist Group (CTG), ang boluntaryong sumuko sa Bulacan PNP sa Lungsod ng Malolos, Bulacan, kamakalawa. 

Batay sa ulat kay PColonel Relly B. Arnedo, provincial director ng Bulacan Police Provincial Office (BUL PPO), kinilala ang mga sumukong miyembro ng RHB na sina alyas Ka Bonbon, 46; at Ka Mila, 71. 

Ayon kay PLt. Colonel Ismael Gauna, force commander ng Bulacan 2nd Provincial Mobile Force Company (PMFC), sumuko ang dalawang dating rebelde dakong 11:00 ng umaga sa Brgy. Sampaloc, San Rafael, Bulacan. 

Ang pinagsanib na mga elemento ng Bulacan PIU, at 2nd PMFC ang  nagpadali sa pagsuko ng dalawang indibiduwal. 

Isinuko rin ni alyas Ka Bonbon ang isang (1) Smith at Wesson Cal. 38 revolver na walang serial number, apat (4) na pirasong bala ng cal. 38, at isang (1) libro ng Neoliberalismo na itinurn-over sa mga tauhan ng Bulacan 2nd PMFC. 

Sinabi ni PD Arnedo na mahigpit ang Bulacan police sa pinaigting na kampanya laban sa insurhensiya at terorismo upang matiyak ang pagkakaloob ng mga serbisyong panlipunan, mga oportunidad sa trabaho.

Gayundin ang isang pinabuting kalidad ng buhay sa mga komunidad na nakararanas o mahina sa armadong tunggalian ng komunista. 

Ayon sa mga dating rebelde, sumapi sila sa grupo ng mga rebelde upang isulong ang reporma ng gobyerno, pantay na karapatan, at katarungang panlipunan. 

Ang kanilang pagsuko ay nagpapakita ng kanilang pangako na muling iayon sa gobyerno para sa mga layuning ito. (MICKA BAUTISTA)