Amok, lalaking may boga  arestado sa paglabag sa Omnibus Election Code

DALAWANG lalaki ang inaresto ng pulisya matapos lumabag sa umiiral Omnibus Election Code na ipinaiiral ng Commission on Elections at Philippine National Police (PNP), partikular ang gun ban at pagdadala ng matatalim na bagay, sa isinagawang operasyon ng pulisya sa Bulacan kamakalawa ng gabi.

Sa San Miguel, Bulacan, arestado si  Herbert Dela Cruz, 37 anyos, residente sa Brgy. Salangan, sa nabanggit na bayan, ng nagrespondeng mga tauhan ng San Miguel MPS sa krimeng Alarm and Scandal, dalawang bilang ng Attempted Murder, Illegal Possession of a Bladed Weapon malinaw na paglabag sa umiiral na Comelec Omnibus Election Code, Malicious Mischief, at Direct Assault na naganap sa Brgy. Salangan, San Miguel.

Nakompiska ng mga awtoridad sa naarestong suspek ang isang jungle bolo na ginamit habang naghahasik ng sindak sa komunidad.

Samantala sa Malolos City, si Sammy Recaido Delos Santos, 42 anyos, ng Mac Arthur Village, Brgy. Longos, Malolos City, ay inaresto ng mga nagrespondeng pulis sa hot pursuit operation sa krimeng Grave Threat at paglabag sa  R.A. 10591 kaugnay ng paglabag sa Comelec Omnibus Election Code na naganap sa Mac Arthur Village, Brgy. Longos, Malolos City.

Nakompiska sa arestadong suspek ang isang  improvised firearm, isang bala ng kalibre .45, at isang  Squires Bingham air gun rifle.

Ayon kay P/Col. Relly Arnedo, provincial director ng Bulacan PPO, ang pulisya sa lalawigan ay matatag na nakatuon upang labanan ang mga pasaway sa batas at karahasan laban sa darating na Barangay at Sangguniang Kabataan Election (BSKE) 2023 na may temang “Pulis ng PRO 3, Partner ng Pamayanan.” (MICKA BAUTISTA)