17-anyos dinonselya ng sariling kuya

LOPEZ, Quezon – Walang-awang sinira ang magandang kinabukasan ng isang 17-anyos dalagita ng kanyang mismong sariling kapatid sa Brgy. Poblacion ng bayang ito.

Ang biktima ay itinago sa pangalang Aida habang detenido naman sa Lock -up Jail ng Lopez Municipal Police Station ang suspek na si Michael, 20, panganay na kapatid ng dalagita, kapwa ng nabanggit na bayan.

Sa ipinadalang report ng Lopez PNP sa Camp Guillermo Nakar sa tanggapan ni Senior Supt. Ronaldo Ylagan,  Quezon PNP Provincial Director, naganap ang pang-aabuso dakong 7 p.m. kamakalawa sa kanilang bahay habang wala ang kanilang mga magulang.

Nabatid na hindi nakapalag si Aida nang tutukan ng patalim sa leeg ni Michael at siya ay ginahasa.

Nang mailugso ang puri ng dalagita ay iniutos ng suspek na huwag sasabihin kahit kanino ang nangyari ngunit biglang dumating ang kanilang mga magulang at naabutan ang umiiyak na biktima.

Bunsod nito, agad isinumbong dalagita ang nangyari kaya ipinaaresto ng mga magulang si Michael. (RAFFY SARNATE)