Supply ng koryente ipinatitiyak sa Meralco

HINIMOK ni Senador Win Gatchalian ang Manila Electric Company (Meralco) na tiyakin ang tuluy-tuloy na supply ng koryente para sa mga customer nito kasunod ng desisyon ng Energy Regulatory Commission (ERC) na tanggihan ang petisyon para sa pagtataas ng singil na inihain ng Meralco at ng power-generation arm ng San Miguel Corporation (SMC).

“Bilang contracting party ng power supply agreement, dapat tiyakin ng Meralco sa mga customer na tuloy-tuloy ang suplay ng koryente alinsunod sa kanilang kontrata sa SMC,” ayon kay Gatchalian.

“Pinupuri ko ang ERC sa pagpapatupad nito ng batas. Ito ay isang magandang balita upang matiyak na ang ibang manlalaro sa industriya ay sumusunod sa kanilang mga kontrata,” dagdag ng senador.

Ang desisyon ng ERC ay nagmula sa desisyon noong 2019 ng electricity arm ng SMC na San Miguel Global Power Holdings Corporation (SMCGP) at mga subsidiary nito na pumasok sa dalawang kasunduan para magsuplay ng enerhiya sa mga customer ng Meralco — sa Sual coal-fired power plant sa Pangasinan at Ilijan natural gas plant sa Batangas.

Noong pirmahan ang mga kasunduan, ang presyo ng coal ay nasa $65/metric ton (MT) mula noon ay tumaas sa mahigit $400/MT. Ang pagnipis ng supply ng koryente mula sa Malampaya natural gas field ay nagresulta sa pagkatuyo ng planta ng Ilijan.

Dahil dito, napilitan ang San Miguel na bumili ng enerhiya sa ibang bansa sa mas mataas na halaga, na nagresulta sa pagkalugi nito.

Ito ang naghikayat na maghain ng petisyon sa ERC para magtaas ng singil ngunit tinanggihan ng ERC.

“Kinikilala natin na mahirap ang trabaho ng ERC para balansehin ang interes ng consumers at industry players. Dahil patuloy na nakakaranas ng paghihirap ang mga consumer sa gitna ng patuloy na pagtaas ng inflation at pagbaba ng halaga ng piso, pinupuri namin ang ERC sa desisyon nito dahil makapagbibigay ito ng ginhawa para sa consumers,” aniya. (NIÑO ACLAN)