HATAW! D'yaryo ng Bayan hatawtabloid.com
NAARESTO ang 12 katao kabilang ang walong babae sa pinaigting na kampanya laban sa mga putahan at mga walang work permit sa Taytay, Rizal.
Gayonman, natuwa pa ang mga empleyado ng Ysabell KTV Bar dahil ligtas na sila sa kamay ng isang alyas Alvin na may-ari ng nasabing club, na sapilitang nag-uutos na magtanghal ng malalaswang panoorin sa harap ng mga kustomer.
Kinilala ang mga nadakip na sina Ashley Llera, 23; Lyka Ramirez, 27; Yna Trinidad, 21; Shanel Anores, 24; Rhebiejoy Delos Santos, 25; Carla Flor, 28; Katlyn Corpez, 28; April Geroquia, 20, at ang mga waiter na sina Edward Dela Cruz, 22; Jolas Cenidoza, 24; Dante Samarita, 25; at Neil Salzar 24, pawang stay-inn sa Ysabell KTV bar.
Base sa imbestigasyon ng pulisya, dakong 12:05 a.m. nang salakayin ng mga awtoridad ang Ysabell KTV bar sa National Road Brgy. San Juan, Taytay, Rizal.
Nabatid na nakatanggap ng impormasyon ang tanggapan ni Taytay, Rizal Police chief, Supt. Elpedio Ramirez hinggil sa malalaswang panoorin sa nabanggit na club bukod sa bentahan ng laman na karaniwang nagaganap sa mga VIP room kaya agad na ipinaberipika ang naturang ulat. Nang magpositibo ang ulat ay agad isinagawa ang pagsalakay na nagresulta sa pagkakadakip sa 12 katao.
(ED MORENO)
