Danao nakiramay at nagpugay sa napaslang na hepe ng pulis sa Ampatuan Maguindanao

PERSONAL na nakiramay si Area Police Command Western Mindanao commander P/Lt. Gen. Vicente Danao, Jr., sa nauililang pamilya ng napaslang na opisyal ng Philippine National Police (PNP) na si P/Lt. Reynaldo Samson, Chief of Police Ampatuan Maguindanao, na tinambangan ng armadong grupo nitong 30 Agosto 2022 sa Sitio Pasio, Brgy. Kapinpilan, Ampatuan, Maguindanao.

Ayon kay Danao, magsisilbi ng warrant of arrest ang grupo ni Samson nang tambangan ng mga suspek.

Kasalukuyang nagsasagawa ng manhunt operation ang pulisya laban sa mga suspek na kinilalang sina Commander Boy at Commander Abdulnasser Sabtula Guianid na sinasabing miyembro ng Karialan Faction ng mga terrorista.

Kaugnay nito, mariing nanawagan si Danao sa Local Government Units (LGUs) sa Mindanao na makiisa sa programa ng pulisya at militar sa kani-kanilang area of responsibility (AOR).

“Kung talagang gusto ninyong makamit ang minimithing kapayapaan sa inyong nasasakupan, kami po ay nananawagan nang lubos na pakikiisa at pagtutulungan para sa iisang adhikain para sa kapakinabangan at kapakanan ng ating mga kababayan,” pagtatapos ni Danao.

Nagpaabot ng tulong pinansiyal ang butihing APC WM commander para sa pamilyang naulila ni P/Lt. Samson at nangakong ibibigay ang hustisyang inaasam ng mga nauilila. (BRIAN BILASANO)