Carnapper, drug dealer, kinalawit ng Bulacan Police

MAGKASUNOD na dinakip sa inilatag na anti-crime drive ng pulisya ang isang lalaking hinihinalang carnapper at isang pinaniniwalaang drug dealer sa lalawigan ng Bulacan nitong Sabado, 20 Agosto.

Sa ulat mula kay P/Col. Charlie Cabradilla, acting provincial director ng Bulacan PPO, kinilala ang suspek na si John Lagrimas, 26 anyos, arestado sa pagnanakaw ng motorsiklo sa ikinasang follow-up operation ng mga tauhan ng San Jose del Monte CPS sa Towerville, Brgy. Minuyan, sa naturang lungsod.

Narekober ng mga awtoridad mula sa suspek ang isang kitchen knife at isang improvised handgun (pen gun) na may kargang dalawang bala.

Kasunod nito, nasukol din sa ikinasang drug bust operation ng Station Drug Enforcement Unit (SDEU) ng San Rafael MPS ang suspek na kinilalang si Jaypee Santos, alyas Jhe sa Brgy. Tambubong, San Rafael.

Nakompiska ang apat na pakete ng hinihinalang shabu at marked money mula sa suspek na kasalukuyang nakakulong sa San Rafael MPS Jail at nakatakdang sampahan ng kasong paglabag sa RA 9165 o Comprehensive Dangerous Act of 2002.

Ayon kay Cabradilla, ang Bulacan police ay hindi nagpapabaya sa masigasig nitong kampanya laban sa mga kriminal at ipiit sila sa likod ng rehas na bakal bilang pagtalima sa kautusan ng Regional Director ng PRO3 na si P/BGen. Cesar Pasiwen. (MICKA BAUTISTA)