HATAW! D'yaryo ng Bayan hatawtabloid.com
NADAKIP ng mga awtoridad ang apat na drug peddler, dalawang wanted persons at anim na law violators sa ikinasang anti-crime operations ng pulis-Bulacan hanggang Linggo ng madaling araw, 13 Disyembre.
Sa ulat na ipinadala kay P/Col. Lawrence Cajipe, direktor ng Bulacan Police Provincial Office, nagresulta sa pagkakaaresto ng apat na drug suspects sa iba’t ibang buy bust operations na isinagawa ng Guiguinto, Calumpit, at Balagtas Municipal Police Stations Drug Enforcement Units (SDEU).
Nakuha ng mga operatiba ang anim na selyadong plastic sachets ng shabu, buy bust money, at sari-saring drug paraphernalia.
Dinala ang mga nakompiskang piraso ng ebidensiya sa Bulacan Provincial Crime Laboratory Office para sa kaukulang pagsususri habang inihahanda ang mga kasong ihahain sa korte laban sa mga suspek.
Samantala, nadakip din ang dalawang wanted persons sa magkakahiwalay na manhunt operations na inilarga ng tracker teams ng 1st Provincial Mobile Force Company at Pulilan MPS sa bisa ng warrant of arrest para sa paglabag sa Sec. 5 (a) at Sec. 5 (i) ng R.A. 9262 at Attempted Murder.
Nasa kustodiya na ngayon ng arresting units ang mga naarestong wanted persons para sa kaukulang disposisyon.
Gayondin, timbog ang anim na suspek sa police response ng mga miyembro ng San Rafael, Hagonoy, Marilao, at Baliwag Police Stations.
Tatlo sa kanila ay suspek sa paglabag sa PD 533 (Anti- Cattle Rustling Law) at paglabag sa PD 1612 (Anti-Fencing Law) na naaresto sa bayan ng San Rafael; dalawang suspek sa mga bayan ng Hagonoy at Marilao sa paglabag sa R.A. 8353 kaugnay sa R.A. 7610, at isang suspek sa Acts of Lasciviousness na naaresto sa bayan ng Baliwag.
Kasalukuyang nakapiit ang mga suspek at inihahanda ang mga kasong kriminal na isasampa sa korte laban sa kanila.
(MICKA BAUTISTA)
