‘Batman’ dedbol sa buy bust (‘Di na nakalipad)

PATAY ang isang ‘tulak’ matapos pumalag at makipagbarilan sa pulisya sa ikinasang buy bust operation sa bayan ng San Ildefonso, lalawigan ng Bulacan, nitong Sabado ng madaling araw, 5 Disyembre.

Sa ulat na nakalap mula sa tanggapan ni P/Col. Lawrence Cajipe, direktor ng Bulacan PNP, kinilala ang napaslang na suspek sa alyas na ‘Batman.’

Sa ipinadalang ulat ng San Ildefonso Municipal Police Station (MPS), dakong 2:40 am nang magkasa sila ng buy bust operation sa Barangay Sapang Putik, sa nabanggit na bayan laban sa isang alyas Batman.

Matapos ang transaksiyon, nakatunog umano ang suspek sa presensiya ng mga pulis sa paligid kaya bumunot ng baril at pinaputukan ang back-up team.

Dito nagkaroon ng ilang minutong palitan ng putok sa magkabilang panig na nagresulta sa pagkamatay ng suspek.

Sa pagproseso ng SOCO Team mula sa Bulacan Provincial Crime Laboratory Office sa lugar, nakakuha ng mga plastic sachet ng shabu, baril, bala, Rusi motorcycle, cellphone, P500 bill na marked money, at identification cards.

(MICKA BAUTISTA)