18-anyos dalaga ginahasa sa banyo (Amaing suspek arestado)

Arestado ang isang lalaki matapos ireklamo ng paulit-ulit na panggagahasa sa dalagang anak-anakan sa bayan ng Angat, sa lalawigan ng Bulacan.

Kinilala ni P/Col. Lawrence Cajipe, direktor ng Bulacan PNP, ang nadakip na suspek na si Ariel Andres, 48 anyos, residente ng Andres Compound, Bgy. Sta. Cruz, sa nasabing bayan.

Batay sa ulat, dakong 3:00 ng madaling araw nitong Miyerkules, 25 Nobyembre, naliligo sa banyo ang 18-anyos na biktima nang pasukin at gahasain ng suspek.

Dahil hindi masikmura ang nangyari sa kanya, ipinasiya ng biktima na umuwi muna sa bahay ng isang kaibigan.

Subalit sinundan pa din siya ng suspek at pilit pinauuwi sa kanilang bahay hanggang bumigay na siya at tuluyan na niyang ibinulgar ang mga ginagawang panggagahasa sa kanya ng amain.

Ayon sa biktima, Grade 4 pa lamang siya nang simulang gahasain ng pangalawang ama at ito ay maraming beses nangyari ngunit nanahimik siya sa takot sa mga banta nito.

Agad inaresto ng pulisya ang suspek at ikinulong sa Angat MPS municipal jail habang inihahanda na ang kasong isasampa sa kanya sa korte. (Micka Bautista)