HATAW! D'yaryo ng Bayan hatawtabloid.com
TANGAN ni Manny Pacquiao ang titulo sa WBA welterweight nang agawin niya kay Keith Thurman sa Las Vegas noong summer ng 2019.
Dinomina ni Senator Pacquiao ang laban kontra American fighter sa early round, kasama ang matinding knockdown ni Thurman sa 1st round.
Gayonman, naghabol sa mga huling rounds ang dating kampeon para dumikit ang iskor sa pagtunog ng final bell.
Nanalo si Pacman via split decision para angkinin ang title belt.
Ang titulong hawak ngayon ni Pacquiao ay hindi taya sa magiging bakbakan nila ni Conor McGregor kung ito ay matutuloy.
Magiging isang exhibition match ang paghaharap nila at posibleng mas mataas sa 147 pounds ang kanilang paglalabanang timbang.
Tinitiyak ng WBA na uupo lang sila sa nasabing event.
Sa kasalukuyan ay wala pang mandatory challenger si Pacquiao sa tangang titulo.
Tanging ang regular champion, interim champion at gold champion ang puwedeng maghamon sa kanya.
Walang itinakda ang WBA kay Pacquiao kung sino ang dapat niyang makaharap.
Nangangahulugan na walang obligasyon si Pacquiao para labanan ang sinoman na taya ang kanyang title.
Pero puwedeng kombinsihin ni McGregor ang WBA na bigyan siya ng oportunidad.
Matatandaan na giniba siya sa 10th round ni Floyd Mayweather sa unang pag-akyat niya sa ring noong 2017.
At sa karta niyang 0-1 sa boksing, marami ang bumabatikos na hindi siya karapat-dapat na maging challenger ni Pacman para sa tangan nitong titulo.
Ayon kay Stephanie Trapp, ang challenger ay dapat nasa hanay ng listahan ng contenders, na dapat ay nanalo sa huli niyang professional bout.
Nangangahulugan na si McGregor ay walang karapatan na hamunin ang kampeon para sa title.
Walang komento ang kampo ni Pacquiao tungkol sa nasabing isyu. Pero malinaw ang pahayag ang kampo niya na haharapin ni Pacquiao ang mapublikong si MMA fighter na McGregor dahil sa malaking ‘purse’ na ang portion nito ay ibabahagi ng Senador sa naging biktima ng CoVid-19 pandemic.
