HATAW! D'yaryo ng Bayan hatawtabloid.com
NAKAPAGTATAKA pa ba kung dagsa ang mga Chinese illegal workers sa bansa kung mismong ang nagpapapasok sa kanila ay isang opisyal na nakatalaga sa pangunahing paliparan ng bansa?!
Kung hind pa ito nakararating sa kaalaman ng mga bossing diyan sa Bureau of Immigration Ninoy Aquino International Airport (NAIA) lalo na sa Terminal 2, dapat sigurong sipag-sipagan nila ang pagmamatyag.
Kung tutuusin, simple lang daw ang operation ni Mr. Official alyas Mr. Cheek Boy, tuwing may sasalubungin na GIs.
Sasabihin niyang pinasasalubong ng isang government official o ng isang Chinese organization.
Aba, malapit na nga raw maubos ang listahan ng mga gov’t official ‘kagagamit,’ as in namedropping, para mapapasok niya nang walang aberya at tanong-tanong ang mga kliyente niyang Genuine Intsik na ang purpose ay magtrabaho sa bansa nang palihim.
Ibig sabihin, illegal workers na ang madalas na napapasukan ay online gaming, BPO, at iba pang kompanya na tumatanggap ng Chinese nationals kahit walang kaukulang dokumento.
Noong una umano ay may ‘pakner-in-crime’ si Mr. Cheek Boy, kaya naman hindi lang ‘liglig-siksik’ kundi ‘umaapaw’ ang raket ‘este ang biyaya ni Mr. Cheek Boy at ng kanyang ‘pakner-in-crime’ na si alyas Rico Mambo.
Ang siste, mukhang nagkasira na si Mr. Cheek Boy at ang kanyang pakner-in-crime.
Simula raw kasi nang maagang nagretiro maaga ang kanyang ‘pakner’ sinolo na ni Mr. Cheek Boy, ang kanilang raket.
Kaya raw mas lalo pang naging tiba-tiba si Mr. Cheek Boy.
Bukod sa solong-solo na niya ang kanyag ‘raket’ sa mga GI, e may estilo pa raw na silipin ang ibang mga terminal na hindi naman ‘under’ sa kanya.
Kapag nasipat na may dumaraang GIs sa ibang terminal, aba lagot sila, dahil tiyak na madadale sila ni Mr. Cheek Boy.
Aruyko!
Uulitin lang po natin, kung hindi pa ito nakararating sa kaalaaman ng mga bossing, ipagtanong-tanong na lang ninyo kung sino si Mr. P. as in Mr. Cheek Boy.
Madali po ninyo siyang makikilala dahil agad na ituturo ng mga kasama niya sa trabaho.
O ‘di ba, Mr. Cheek Boy?!
‘Yun o!
CAYETANO QUALIFIED
NA QUALIFIED
MAGING SPEAKER
PAGTUNGO ni Pangulong Duterte papunta sa Bangkok, hindi niya pinalampas ang aniya’y ‘hostage’ sa 2019 National Budget ng mga kongresista kaya nagkahetot-hetot ang Build Build Build at ibang programa ng pamahalaan.
Kaya sinabi niya na bilisan ang pagtalakay sa national budget sa pagbubukas ng kongreso ngayong 22 Hulyo 2019.
Kapag ganyan ang order ng Pangulo, walang dudang kuhang-kuha ni Rep. Alan Cayetano ang takbo ng kanyang utak kaya noong nakaraang linggo ay nag-sponsor siya ng economic workshop para sa mga kongresista na dinaluhan ng mga kalihim ng DOF at DPWH at matataas na opisyal ng DOTR, BCDA at ng Build Build Build Team.
Layon nito na maunawaan ng mga mambabatas kung ano ang mga priority programs ng administrasyong Duterte.
At ‘yan ang dahilan kung bakit masasabing walang ibang layunin si Cayetano sa kanyang speakership bid kundi susugan at ipatupad ang mga programang inilatag ng pangulo. At hindi ito magiging mahirap kay Cayetano lalo sa pakikipag-usap sa senado dahil naging miyembro siya nito nang siyam na taon.
Sabi nga, alam na alam ni Cayetano kung paano makikipag-usap sa senado at sa mga kapwa kongresista dahil naging kongresista na rin siya nang tatlong termino.
Maging sa mga lider ng buong mundo at sa executive department dahil siya ay umupong DFA secretary at naging miyembro ng gabinete.
Hindi rin matatawaran ang kanyang kakayahan sa local governance dahil naging konsehal at vice mayor siya ng Taguig noon.
Sa isyu ng umano’y vote buying sa Kamara, hindi rin nabahiran ang pangalan ni Cayetano dahil ang kanyang mga katunggali ang sinasabing may pakana nito. Patunay na tinitindigan niya ang kanyang prinsipyo laban sa katiwalian at korupsiyon.
Kung loyalty lang din naman kay Duterte ang pag-uusapan, walang duda kay Cayetano. Mula sa pagkapanalo ni PRRD sa Taguig noong 2016 election at sa pamamayagpag ni Bong Go na trusted aide ni Duterte at iba pang Hugpong senators sa Taguig sa katatapos lamang na eleksiyon.
At asahan natin, hindi niya aatrasan ang pagsuporta sa anti-drug campaign ng pangulo at sa pagtindig maging sa international courts sa mga kumukuwestiyon sa human rights policy ng pangulo.
Kaya naman, hinding-hindi malulugi ang bansa kung si Alan Cayetano ang magiging Speaker of the House.
Kung karanasan, galing, talino at iba pang kalipikasyon ang pag-uusapan, sabi nga, may nanalo na!
Para sa mga reaksiyon, suhestiyon, reklamo at sumbong, magtext sa 0977.705.22.31 o mag-email sa [email protected]. Para sa mga nakaraang isyu ng BULABUGIN please visit https://hatawtabloid.com
BULABUGIN
ni Jerry Yap
