2 tauhan ni Kerwin timbog sa Ormoc

DALAWANG tauhan ng hinihinalang drug dealer na si Kerwin Espinosa ang naaresto sa police operations sa Ormoc City nitong Sabado ng umaga.

Ang suspek na si Brian Anthony Zaldivar alyas Tonypet ay naaresto sa bahay ng kanyang live-in partner sa Brgy. Luna dakong 7:00 am.

Makaraan ang isang oras, naaresto sa Brgy. Macabug ang isa pang suspek na si Jesus Tulin.

Ayon sa pulisya, sina Zaldivar at Tulin ay naaresto sa bisa ng arrest warrant na inisyu ni Baybay, Leyte Regional Trial Court Branch 14 Judge Carlos Arguelles para sa kasong murder.

Kapwa akusado ng dalawang suspek si Espinosa.

Magugunitang si Zaldivar ay ginamit bilang testigo ni Albuera, Leyte police chief Jovie Espinido sa mga kasong inihain laban sa hinihinalang mga protektor ni Espinosa nitong nakaraang taon.

Kalaunan, binawi ni Zaldivar ang kanyang testimonya, sinabing pinuwersa lamang siya ni Espenido na pirmahan ang kanyang affidavit.

Sina Zaldivar, Tulin at Espinosa ay kinasuhan ng murder bunsod nang pagpatay sa isang nagngangalang Gregorio Velarde Sr. noong 2015.