Melai, ipinagtanggol si Jason sa pamamagitan ng open letter

GUMAWA ng  open letter si Melai Cantiveros sa kanyang Instagram account para ipagtanggol ang asawang si Jason Francisco laban sa kanyang bashers. Ito ay may kinalalaman sa ginawang pag-amin ni Jason na hiwalay na sila ni Melai dahil sa pagseselos kay Carlo Aquino na siyang nakapareha ni Melai sa katatapos lang na serye nilang We Will Survive.

Sabi ni Melia sa message niya sa kanyang IG account, “Ang asawa ko ang pinaka-best na asawa sa lahat. Walang bisyo, ‘di umiinom, ‘di nagyoyosi. Kami lang ang bisyo ng asawa ko. Good provider ‘yan at kami lang ang inuuna niyan kahit kanino man.

“Kaya ganun-ganun na lang niya kami kamahal. Ramdam na ramdam namin ni Mela (anak nila ni Jason) yun. Overprotective siya sa amin sa lahat ng bagay.”

”Sa mga mag-asawa, pagdadaanan talaga ang mga pagsubok at ang pagsubok ay unlimited. Kaya sa mga nagba-bash sa asawa ko, kung may respeto kayo sa relasyon namin, sa akin, sana ay tigilan niyo na at kami lang din ang makakaayos nito.

“Kung wala man kayong magandang sabihin, wag na lang kayo pumindot at manakit. Hindi niyo kilala asawa ko at di niyo alam kung saan siya nanggagaling. I’m sure lahat tayo may ganun. Kaya sana tigilan niyo na ang pag-judge sa aking bana. Kasi kung masasaktan ang aking bana, mas masasaktan ako  Double at triple pa ang sakit na nararamdaman ko. Mas sobra pa kay Mela kung mababasa niya ang comment ninyo.”

“May mga mali at tama, pero time will heal all wounds. Walang kampihan at di kailangan ng kampihan kung sino dito kasi di naman kami magkaaway. MAG-ASAWA po kami.

MA at PA – Rommel Placente