HATAW! D'yaryo ng Bayan hatawtabloid.com
WALA nang buhay nang matagpuan ang isang manggagawa sa gilid ng bypass road sa bayan ng San Ildefonso, lalawigan ng Bulacan, nitong Lunes, 9 Marso.
Kinilala ang biktimang si Ramil Segguep, 30 anyos, residente ng Purok 3, Brgy. Casongsong, sa bayan ng Guimba, lalawigan ng Nueva Ecija.
Nabatid na nagtatrabaho ang biktima bilang kargador sa isang pagawaan ng semento sa Sta. Maria, Bulacan.
Natagpuan ang kaniyang bangkay dakong 7:00 ng umaga na walang suot na pang-itaas at naka-shorts lamang.
Ayon sa asawa ng biktima na si Marylyn Segguep, tumawag ang San Ildefonso MPS upang ipaalam ang pagkakakilanlan ng kanyang asawa.
Ayon kay Marylyn, may pitong tama ng bala sa katawan ang biktima – apat sa likod, dalawa sa balikat, at isa sa sintido.
Bukod dito, nakatakip ng packing tape ag bibig ng biktima at facemask sa kaniyang mata nang matagpuan.
Ayon sa paunang imbestigasyon, huling nakitang buhay ang manggagawa noong gabi ng Linggo, 8 Marso.
Ayon sa isang driver sa kanilang pinagtatrabahuhan, nakipag-inuman umano si Segguep sa dalawang lalaki sa barracks.
Matapos ang inuman, naligo umano ang biktima bago umalis ng barracks bitbit ang kaniyang bag.
Sinabi umano niya sa katrabaho na uuwi siya nang gabing iyon sa Guimba dahil may susundo sa kanyang nakakotse.
Samantala, sinabi ni Marylyn na huli silang nag-usap 5:00 ng hapon at wala umanong nabanggit na uuwi siya sa Nueva Ecija.
May isa pa aniyang tawag ang kanyang asawa bandang 7:00 ng gabi ngunit hindi niya nasagot.
Kinabukasan, natagpuan na ang bangkay ni Segguep sa Bulacan na nakahandusay sa tabi ng kalsada.
Ayon pa kay Marylyn, sampung taon nang nagtatrabaho si Ramil sa pagawaan ng semento at walang nababanggit na kaaway o nakaalitan.
Samantala, patuloy ang imbestigasyon ng pulisya upang matukoy ang motibo sa krimen at malaman ang mga posibleng responsable sa pagpatay. (MICKA BAUTISTA)
