2 bangkay sa sinunog na kotse kinilala ng pulisya, 2 POI tinutugis

PINANGALANAN nang pulisya ang dalawang bangkay na natagpuan sa sinunog na kotse sa Barangay Sinasajan, Peñaranda, Nueva Ecija nitong Lunes ng umaga, 9 Marso kasabay ng pagtugis sa dalawang persons of interest (POI) sa nasabing insidente ng paspaslang.

Kinilala ang mga biktima na sina Michael Odchigue y Gallardo, 39 anyos, walang asawa, rescue officer, residente sa Barangay Santolan; at Regine Espinosa y Moroata, 34, single, negosyante, residente sa Barangay Singgalat, kapuwa sa Palayan City, Nueva Ecija.

Tinutugis na rin ng mga awtoridad ang dalawang POI kaugnay ng pagbaril sa ulo at sa batok ng dalawang biktima kasunod ng pagsunog sa kotse.

Sa imbestigasyon, nabatid na magkaibigan ang mga biktima at ayon sa kaanak ng negosyante, magbebenta siya ng apartment building na nagkakahalaga ng P18 milyon.

Pinakiusapan aniya ng babaeng biktima ang kasamang rescue officer para siya ay ipagmaneho at samahan sa transaksiyon.

Sa pahayag ng mga kaanak ng negosyante, posibleng may kinalaman ang dalawang buyer ng apartment sa krimen na nakita nilang sumakay sa sasakyan ng biktima.

Ayon kay Police Captain Vincent Taylor, Officer-In-Charge ng Peñaranda Municipal Police Station, may initial motive na sila na ang krimen ay may kinalaman sa pera pero ibeberipika pa nila ito kapag nadakip na ang mga suspek.

Bukod sa sinunog, binaril din ang dalawa sa bandang batok at nang mapatay ay iniwan sa loob saka sinunog ang sasakyan sa liblib na lugar. (MICKA BAUTISTA)