HATAW! D'yaryo ng Bayan hatawtabloid.com
NATAGPUAN ng mga awtoridad ang tatlong abandonadong pabrika ng ilegal na sigarilyo sa Pampanga, na nagpapalakas ng hinala na isang sindikato ang nag-o-operate sa probinsiya.
Ang pagkakatuklas ay kasunod ng pagsalakay noong 29 Enero sa isang katulad na pasilidad sa Mexico, Pampanga, na milyon-milyong pisong halaga ng mga ilegal na sigarilyo at kagamitan ang nakompiska.
Binanggit ni Interior Secretary Jonvic Remulla, ang posibleng presensiya ng isang ‘tobacco lord’ sa Pampanga na sinasabing pinoprotektahan ng dalawang mambabatas sa Gitnang Luzon.
Ayon sa Kalihim, iniimbestigahan ang dalawang mambabatas kaya hindi pa nila mapangalanan pero sila ay ‘persons of interest’ dito.
Sa mga inabandonang lugar na matatagpuan sa San Fernando City, Mexico, at San Simon ay may ipinahiwatig mula sa security logbook na ang mga taong sangkot ay huling naroon noong 29 Enero —kaparehong araw na sinalakay ang ikaapat na pabrika.
Nakompiska mula sa tatlong lokasyon ang tatlong makinang pangtuyo ng tabako, dalawang makinang panggawa, isang makinang pang-impake, at apat na bahagi ng makinang pang-impake, kasama ang mga hilaw na materyales, mga filter ng sigarilyo, at pinaghihinalaang pekeng mga selyo ng buwis.
Sinabi ni Remulla, ang mga nakompiskang ebidensiya, kabilang ang mga walang dokumentong sigarilyo, ay nagkakahalaga ng halos P400 milyon na ang bawat lugar ay maaaring makagawa nang hanggang P160 milyong halaga ng sigarilyo araw-araw.
Dagdag niya, ang mga rehistradong kompanya, nakompiskang makina, at dalawang tatak ng sigarilyo na natagpuan sa mga lugar ay hindi nakalista sa National Tobacco Administration kaya 100 porsiyentong ilegal ang ginagawa rito at wala sa tatlong lugar ang may mga business permit mula sa kani-kanilang mga lokal na yunit ng pamahalaan.
Samantala, nangako ang Philippine National Police (PNP) na pipigilan ang ilegal na kalakalan ng sigarilyo na maging isang banta sa lipunan gaya ng mga ipinagbabawal na operator ng POGO sa Filipinas.
Sa isang pahayag, sinabi ni PNP chief P/Gen. Jose Melencio Nartatez, Jr., ang puwersa ng pulisya ay patuloy na magpapanatili ng aming matagumpay na operasyon laban sa mga ilegal na sigarilyo.
Naglabas ang PNP ng ganitong pahayag matapos ilarawan ni Marikina Rep. Romero Quimbo ang ilegal na kalakalan ng sigarilyo bilang ‘bagong POGO’, na inaakusahang pinatatakbo ng mga dayuhan na minarkahan nang hindi makataong mga kondisyon sa paggawa. (MICKA BAUTISTA)
