HATAW! D'yaryo ng Bayan hatawtabloid.com
ni Allan Sancon
MAS masaya at mas kampante sina Kim Chiu at Paulo Avelino nang humarap sa media sa engrandeng press launch ng kanilang teleseryeng The Alibi, Ang Buong Katotohanan.
Ramdam ang kakaibang chemistry ng dalawa habang sinasagot ang maiinit na tanong tungkol sa kanilang teleserye at sa mga eksenang tiyak na pag-uusapan ng mga manonood.
Hindi maikakaila, mas matapang, mas maangas, at mas mapangahas ang KimPau sa bago nilang teleserye.
Matapos kasing unang ipalabas sa Prime Video ang serye, mas pinahaba, mas pinatindi, at mas dinagdagan pa ang mga rebelasyon para sa Free TV airing ngayong Marso 2026.
Ayon kay Direk Jojo Saguin, may mga eksenang hindi pa napanood ng publiko—mga tagpong maglalantad ng mas malalim na sikreto, pagtataksil, at nakagugulat na twists na magpapainit sa takbo ng istorya.
Kaya naman lalong tumataas ang intriga: ano pa ang hindi alam ng mga manonood?
Sa serye, gaganap si Kim bilang isang sikat na “star dancer” na nasasangkot sa isang misteryosong krimen.
Dito umiikot ang kuwento—isang alibi na posibleng kasinungalingan, at isang katotohanang pilit tinatakpan.
Aminado ang aktres na isa ito sa pinaka-challenging role niya. Kailangan niyang ipakita hindi lang ang husay sa drama kundi pati pisikal na preparasyon para sa mga intense dance sequences at emosyonal na eksena.
“Ibang-iba ito sa mga nagawa ko na,” saad niya.
Pero ang mas lalong pinag-uusapan? Ang mas mapangahas nilang eksena ni Paulo.
Isa sa pinaka-aabangan ang mainit na kissing scene sa loob ng sasakyan na agad nag-trending matapos mapanood sa Prime Video.
Sa tindi ng halikan ng KimPau ay nagulat na lang si Paulo nang mapansing pati labi niya ay kulay pula na rin.
“Nagmukha nga akong clown after niyong scene,” natatawang kuwento ng aktor.
Hindi naman nagpahuli si Kim sa pagbibiro. “Hindi kasi smudge-free lipstick ang ginamit ng make-up artist that time kaya kumalat!”
paliwanag niya sabay halakhak.
Ngunit sa likod ng biruan, aminado ang dalawa na mahalaga ang tiwala at respeto sa isa’t isa para maisagawa ang ganitong klaseng eksena. Professionalism at commitment sa proyekto ang kanilang sandata.
Sa kabuuan, hindi lang simpleng love story ang The Alibi, Ang Buong Katotohanan. Isa itong kwento ng panlilinlang, pag-ibig, at katotohanang pilit inililihim. Habang papalapit ang Free TV premiere, lalong umiinit ang usap-usapan: handa na ba ang publiko sa mas matinding rebelasyon? O may mas malaki pang pasabog na ikagugulat ng lahat?
