HATAW! D'yaryo ng Bayan hatawtabloid.com
ni NIÑO ACLAN
MAS pinalambot ang lengguwaheng ginamit sa ilalabas na committee report ng Senate Blue Ribbon Committee.
Ito ang kinompirma ni Committee Chairman Senador Panfilo “Ping” Lacson sa isang panayam.
Ayon kay Lacson imbes “to be charged” ay preliminary investigation or further investigation ang rekomendasyon laban sa mga kasamahan nilang senador.
Magugunitang sa naunang lumabas na bersiyon ng draft committee report ay inirerekomenda na sampahan ng kaso ang mga senador na sina Joel Villanueva, Jinggoy Estrada, at Francis “Chiz” Escudero.
Binigyang-linaw ni Lacson na kahit ‘pinalambot’ ang lengguwahe batay na rin sa rekomendasyon ng mga miyembro ng mayorya ay hindi pa rin nagbago ang nilalaman ng report.
Inamin ni Lacson na tulad ng mga senador ay ganoon ang rekomendasyon ng komite kina dating Senador Ramon “Bong” Revilla, Jr., dating Ako Bicol Rep. Zaldy Co, at dating Rep. Mitch Cajayon.
Umaasa si Lacson na dahil sa pagbabago ng lengguwahe ng report ay makakukuha siya ng 11 pirma o suporta ng mga miyembro ng komite.
Magugunitang ng paglabas ng unang draft committee report ang isa sa sinasabing dahilan ng pag-ugong ng pagpapalit ng liderato sa senado.
